Home  »  Poems of Places An Anthology in 31 Volumes  »  Jean of Aberdeen

Henry Wadsworth Longfellow, ed. Poems of Places: An Anthology in 31 Volumes.
Scotland: Vols. VI–VIII. 1876–79.


Jean of Aberdeen

By Alexander Laing (1787–1857)

YE ’ve seen the blooming rosy brier,

On stately Dee’s wild woody knowes;

Ye ’ve seen the op’ning lily fair,

In streamy Don’s gay broomy howes;

An’ ilka bonnie flower that grows

Amang their banks and braes sae green,—

These borrow a’ their finest hues

Frae lovely Jean of Aberdeen.

Ye ’ve seen the dew-eyed bloomy haw,

When morning gilds the welkin high;

Ye ’ve heard the breeze o’ summer blaw,

When e’ening steals alang the sky.

But brighter far is Jeanie’s eye

When we ’re amang the braes alane,

An’ softer is the bosom-sigh

Of lovely Jean of Aberdeen.

Though I had a’ the valleys gay

Around the airy Bennochie,

An’ a’ the fleecy flocks that stray

Amang the lofty hills o’ Dee;

While Mem’ry lifts her melting ee,

An’ Hope unfolds her fairy scene,

My heart wi’ them I ’d freely gi’e

To lovely Jean of Aberdeen.