Robert Burns (1759–1796). Poems and Songs.
The Harvard Classics. 1909–14.

213 . Song—Up in the Morning Early

CAULD blaws the wind frae east to west,

The drift is driving sairly;

Sae loud and shill’s I hear the blast—

I’m sure it’s winter fairly.

Chorus.—Up in the morning’s no for me,

Up in the morning early;

When a’ the hills are covered wi’ snaw,

I’m sure it’s winter fairly.

The birds sit chittering in the thorn,

A’ day they fare but sparely;

And lang’s the night frae e’en to morn—

I’m sure it’s winter fairly.

Up in the morning’s, &c.